کوئٹہ: مشتبہ خود کش بمبار شہریوں کی فائرنگ سے ہلاک

۔—فائل فوٹو

کوئٹہ:کوئٹہ میں سب سے زیادہ دہشت گردی کا شکار ہونے والے علاقے ہزارہ ٹاؤن کو آج پھر نشانہ بنانے کی کوشش کی گئی، منصوبہ سازوں نے افطار کے وقت خود کش حملے کا منصوبہ بنایا تھا لیکن اس بار ان کی سازش دھری رہ گئی۔

خود کش حملہ آور جیسے ہی علاقے میں داخل ہوا تو پہلے سے کسی ناخوشگوار واقعے کیلیے تیار شہریوں نے اسے گولیاں مار کر ہلاک کر دیا۔

ڈی آئی جی آپریشن فیاض سنبل نے ہزارہ ٹاؤن میں ہلاک شخص کے خود کش حملہ آور ہونے کی تصدیق کر دی ہے۔

انہوں نے کہا کہ ہزارہ ٹاؤن میں مارا جانے والا شخص خودکش حملہ آور تھا اور اس کے پاس سے خود کش جیکٹ بھی تھی جسے ناکارہ بنا دیا گیا ہے۔

فیاض سنبل نے بتایا کہ حملہ آور کی لاش بولان میڈیکل کمپلیکس منتقل کردی گئی ہے۔

یاد رہے کہ اس سے قبل بھی گزشتہ کچھ سالوں کے دوران ہزارہ ٹاؤن میں دہشت گروں کی جانب سے ہزارہ ٹاؤن کو نشانہ بنایا جاتا رہا ہے۔

اس طرز کا سب سے بدترین سانحہ رواں سال 16 فروری کو اس وقت پیش آیا تھا جب ایک واٹر ٹینکر میں بارودی مواد رکھ کر اسے مارکیٹ میں دھماکے سے اڑا دیا گیا تھا جس کے نتیجے میں کم از کم 90 افراد ہلاک اور 200 سے زائد زخمی ہو گئے تھے۔